Hamiləlikdə rezus faktor uyğunsuzluğu

Qan qrupu eritrositlərdə rast gəlinən A və B aqqlütinogen, plazmada rast gəlinən alfa və beta aqqlütinin proteinlərinin qarşılıqlı münasibətinə görə təyin edilir. Bu proteinlərlə 4 qan qrupu təyin edilir: 0, A, B və AB. Bununla yanaşı digər bir nəzərə alınmalı əlamət rezus faktordur.

Rezus faktor- insan eritrositlərində olan bir proteindir. Əgər eritrositlərdə bu faktor varsa, qan qrupu Rh(+), yoxdursa, Rh(-) olur. İnsanların 85 faizində Rh müsbətdir.

Hamiləlik zamanı ananın qan qrupu Rh(-)dirsə, dölün qan qrupunun müsbət olduğu hallarda rezus uyğunsuzluq meydana çıxa bilər.

Əgər ana Rh müsbət, ata Rh mənfidirsə, Mendel qanunlarına görə döl ata rezus zülalı geninə görə homoziqotdursa, 100 %, heteroziqotdursa, 50 % hallarda rezus müsbətdir.

Belə ki, əgər döl orqanizmində ana orqanizminə yad olan zülal sintez olunursa, ola bilər ki, ana orqanizmi buna immun reaksiya ilə cavab versin. Bu zaman ananın orqanizmindən döl qan dövranına keçən anti-rezuslar qan hüceyrələrinin çökməsinə səbəb olur, döldə anemiya əmələ gəlir. Prosesin ağır formaları dölün bətndaxili ölümünə gətirib çıxara bilir.

Buna görə də ananın qan qrupunun Rh mənfi, atanın qan qrupunun Rh müsbət olduğu bütün hallarda “Rh uyğunsuzluq” varmış kimi taktika seçilir. Hamiləliyin 28-32-ci həftələrində və doğuşdan sonra 72 saat ərzində anaya anti-D immunprofilaktika aparılır.

Bənzər şəkildə qan qrupu Rh mənfi olan qadınlara küretaj, ektopik hamiləlikdən sonra da anti-D immunprofilaktika aparılmalıdır.