Hamiləliyin davamiyyəti

Statistika göstərir ki, uşaqların ancaq 4%-i   hesablanan gündə dünyaya gəlir. Qalan 96% halda isə uşaqlar ehtimal olunan doğuş günündən 10 günə qədər müddətdə tez və ya gec doğulurlar.

Doğuş günü hesablanma prinsipinin əsasını  hamiləliyin 280 gün davam etməsi təşkil edir. Lakin uşaq hesablanan gün dünyaya gəldikdə, onun yaşı 266 gün (38 həftə) təşkil edir. Bu da onunla əlaqəlidir ki, hamiləlik müddəti  mayalanma günü əsasında deyil, axırıncı aybaşının birinci gününə əsasən hesablanır. Bu isə o deməkdir ki,  mayalanma gününü dəqiq müəyyən etmək az hallarda mümkün olur.

Ehtimal olunan doğuş tarixini necə müəyyən etmək olar? 

Doğuş gününü gələcək analar böyük maraqla və səbirsizliklə gözləyir. Bu gün qadın həyatının ən əlamətdar günlərindən biridir. Əlbəttə, gələcək analar öncədən doğuşun nə vaxt olacağını bilmək istəyir. Ultrasəs müayinəsinin nəticəsindən asılı olmayaraq, doğuş gününü müəyyən etmək məqsədilə hesablamalar aparılır.

Doğuş günü= axırıncı aybaşının birinci günü – 3 ay+ 7gün + 1il

Aybaşı tsikli 28 gündən az və ya çox olan qadınlarda doğuşun gününü təyin edərkən əlavə günlər əlavə edilir və ya çıxılır.

Doğuş günü = axırıncı aybaşının birinci günü – 3 ay+ 1il ( + və ya - x gün)

Bəzi hallarda ultrasəs müayinəsi ilə hesablanan hamiləlik müddəti uyğun gəlmir. Bu halda hamiləliyin 18-ci həftəsinə qədər aparılmış ultrasəs müayinəsinin nəticəsi əsas olaraq götürülür.