Maqnezium

Maddələr mübadiləsində iştirak edən bir çox fermentlər üçün  maqnezium kofaktor rolunu oynayır, yəni bir çox fermentlərin maksimal aktivliyinin təzahür etməsi üçün vacib olan qeyri-zülali kimyəvi birləşmədir. Maqnezium çatışmazlığı baldır əzələlərində qıcolmalara, mədə-bağırsaq traktında spazmlara səbəb olmaqla yanaşı daha ciddi problemlərə - düşüyə, vaxtından əvvəl doğuş sancılarına gətirə bilər. Maqneziumun təbii mənbələrinə  ilk növbədə yaşıl tərəvəzlər, günəbaxan toxumları, təbii düyü, badam, buğda unu, banan və bu elementlə zəngin mineral su aid edilir.

Bir  çox hamilələrə həkim mama-ginekoloqlar tərəfindən maqnezium preparatları təyin olunur. Hamilə qadınlara gündə 310 mq maqnezium istifadə etmək tövsiyə olunur. Maqnezium və dəmir qarşılıqlı olaraq bir-birinin sorulmasına maneçilik törətdiyindən bu preparatlar ayrılıqda və 2 saatdan az olmayan intervalla qəbul olunmalıdır.